|
| 雖然好想完成個遊記,但係已經冇晒mood去寫lu....寫遊記,最好都係返黎第一日就寫晒佢...
近排越來越覺得世事無常...今日你覺得o岩o既o野,過幾日可能已經覺得唔o岩...今日你相信o既o野,可能好快你就唔會再相信...今日你聽到一個人對你講一句說話,你亦都相信佢,但係過幾日,你會發覺原來佢講大話
事實永遠只有一個,太陽亦都永遠由東面升起,但係,如果你一定要同自己講太陽係由西面升起,咁你可以選擇永遠唔好比自己見到日出,你絕對有選擇o既權利,可以快樂地相信一個謊言,亦可以痛苦地搵出真相
你o既世界,就係你自己o既世界,你相信一件事係o岩o既話,咁呢件事o係你o既世界入面就係o岩,當你有人話你知一個唔同o既真相,你可以選擇否認真相
不過,我追求o既,係事實,係真相. | | |
| 第四日
由於食左Regency o既自助餐,以乎唔太乾淨,所以今日兩個都肚疴.....救命...所以,行程安排亦都冇
咁緊密.
一早起身先食個酒店早餐,之後就去一個好少人去o既沙灘~多數人黎長灘島都係去White Beach,因為
呢個沙灘係最出名,不過其實長灘島都仲有幾個好少人去o既沙灘,o係風和日麗o既早上,o係一個冇遊
客o既沙灘漫步,執貝殼,真係人生一大快事~~~~
呢個沙灘叫Puka Shell Beach(貝殼沙灘)~
其實貝殼沙灘o既沙,唔係真係沙黎架,係一D好細好碎既貝殼,睇真D o既話,會發覺D沙真係好靚~
我地執左好多貝殼,仲有好多白色o既珊瑚添呀~
跟住一直行,行到沙灘o既盡頭,坐坐下,見到海中心舊黑雲竟然整左個龍卷風出黎~~~好壯觀~~
睇完龍卷風,我地就返左酒店酒休息一陣,然後再出While Beach食lunch~今次呢間我覺得幾特別,成間餐廳都係鏡~
跟住就去食甜品~呢個甜品叫Halo-Halo~有D似刨冰,不過除左有冰之外,仲有好多水果同果汁,仲有煉奶,同埋有雪糕~最特別o既係,竟然有栗米片!?我地一杯兩個人食,因為都幾大杯.....
跟住就行沙灘~個沙灘真係好鬼死靚~我地仲裝左D好幼o既沙返酒店,用黎做手信~
(to be continued)
| | |
| 第三日
約好左8點出海,梗係要準時啦~一早撘三輪車去到約定地方等,一黎到已經見到Jessie,佢好開心咁同我地握手,因為佢好驚我地唔出現~而我地又好準時喎~
跟住佢就拎埋兩個浮潛鏡同我地去坐船出海~冇錯,係浮潛~今日我地就係玩浮潛喇~
不過呢,成個package係釣魚加浮潛,浮潛就會去三個地方,一個係淺水o既地方,另外兩個係o係島上面o既洞~洞入面有水,D水係通向大海~
先講釣魚,Jassie幫我地買左D蝦肉用黎釣魚,我地用左個幾兩個鐘釣魚,我一條都釣唔到....但係有人竟然釣得多過個船夫!!個釣到小丑魚添呀~~~每次一釣到小丑魚,個船夫就會話"finding nemo",好搞笑~
釣完魚,跟住就去浮潛喇~~~呢個簡直係黎長灘島o既最終目的呀!!
船夫駛到鱷魚島(真係好似鱷魚)附近,去到一個比較淺水o既地方,然後我地就帶埋浮潛鏡同相機落水~~
有人唔識游水,驚到要扶住隻船~
我就游到好遠,又影左好多相~Jessie之前準備左D面包,而家大派用場,一放落水,成群熱帶魚包住你~~
呢一帶水域好多珊瑚礁,好靚~~~
玩完呢度,船夫帶我地去Crystal Cave Island,D洞真係有Crystal架,不過好似冇乜吸引力~
第一個洞比較大,同埋多人~一落水,D水好凍,可能因為冇太陽晒住~我游到好出,不過其實冇乜特別,我驚會有船或者大魚,所以好快就返黎埋岸~
跟住行去第二個洞,呢度就冇乜人,而且呢個洞最特別o既係,要穿過一個好細o既洞穴,然後先會見到有水~
好快,成個浮潛旅程已經完結.....跟住我地上返船,然後返返去Boracay.
玩左一個上午,好累,跟住當然要去食下野~~o係d mall有好多野食,我地就揀左間日本野黎食,睇下呢度食返出面D野好唔好食~
我地叫左一個烏冬同一個拉面,兩樣都好普通,似乎冇香港o個D咁好食...又叫左Mango Banana Shake同Mango Apple Shake,兩樣都好好飲,呢度似乎都係水果比較出名~
(後補食野相)
休息一會,再出沙灘游水~咁靚o既沙灘,百游不厭~
我地又去返同一個位置坐似,個waiter又認得我地喎~跟住我叫佢介紹D野比我地飲,佢話有個mint leave乜鬼好正,我就叫左一杯試下~某人當然唔飲酒精,淨係叫左杯可樂~
(後補飲野相)
mint leave乜鬼果然好飲~呢間酒吧D cocktail真係唔錯~~值得推介~
唔講你唔知,呢個沙灘o係好淺水o既地方都有魚~D魚白色,專食沙下面o既微生物,所以呢~要引佢地黎都唔係咁難~
(後補游水相)
游完水~又係睇日落o既時間~我當然又不停地影相啦~
(後補日落相)
日落之後,又開始周圍搵野食~Regency係呢度一間好大o既酒店,我地就去試下佢o既Buffet~
我個人認為冇乜特別,款式唔多,又唔係話好好味,但係又唔平喎~都要百幾蚊港幣一位架...(食完呢間野之後,肚疴左幾日,仲要返到香港都仲疴緊.....救命...)
(後補食野相)
食完野,已經好累,梗係快D返酒店啦~跟住去撘shuttle bus,點知等左好耐都唔見架車黎......等左半個鐘,終於等到,點知個司機向我地做個手勢,話好快會返黎接我地,點知,等多三個字都唔見架車返黎.....我太累,唔再等,自己搵三輪車返酒店,都只不過係100Peso(即係港幣十幾蚊),唔酒十五分鐘就返到酒店~yeah~
好累~自從訓完機場之後,都未回復精力.....早D訓~
雖然已經玩左浮潛,但係長灘島仲有好多好玩o既野~跟住就會玩到~
(to be continued...)
| | |
| 第二日
上回講到,架飛機飛走左,搞到要訓機場...
我成晚訓唔著,靚係閉目養神.
直到4點幾,為左今次唔再遲,我地就快手快腳執好野,去check in~今次終於成功check in到~
跟住就食少少野,然後等上機~
o岩o岩日出冇幾耐就上機lu~~
第一次撘咁細架飛機,仲要係螺旋漿飛機~~~~
飛去Caticlan只雖要一個鐘左右~原來唔單止架飛機細,個機場都好細,我諗得千幾呎...都唔知有冇.
跟住買飛撘三輪車(Tricycle)去碼頭,再撘船去長灘島~
三輪車係長灘島o既主要交通工具,而且好平~另外仲有D Van仔,不過除左酒店o既Van仔,我就未撘過其他喇.
上岸喇~終於到左長灘島~~~~
菲律賓無論邊度,只要多人就會有好多苦力,尤其呢D遊客區就更多~佢地好主動咁搶你D行李,然後唔問你就會搬左D行李上車,就係為左少少tips,好彩我地叫停左佢地,然後話我地會坐酒店o既專車~
不過等左好耐都唔見酒店車.....我地唯有走左去差館借電話打(碼頭竟然冇電話....)(呢度D警察叫做Pulis即係Police),打左去酒店,佢地都幾好招呼,即刻搵人揸車黎接我地~(後來先知原來呢D service係要錢...)
Anyway,終於去到酒店,我地入主長灘島最唔方便o既酒店,Alta Vista..出入全部要撘車,行路唔係唔得,不過最近o個個沙灘(Puka Shell Beach)都要行最少半個鐘囉....
其實我地已經遲左一日check in,所以今日早餐都包埋~咁check in完就梗係即係食左先啦~
所有新住客都會有杯welcome drink,好清涼,幾好飲~~
食飽早餐,已經好累,又成晚冇訓,所以返左房沖個涼休息一陣先~
之後,撘二點鐘班車落d mall(呢度最多野買o既地方),行左陣,又買左一件衫同一條沙灘褲,都唔平架...
然後行出沙灘,呢個就係世界聞名o既沙灘~~
行行下,發覺好多人黎promote呢度D水上活動,平均每行一百米就有一個....煩死....
其中一個好搞笑o既人,佢叫Jessie,個名雖然好似女仔,但係佢係個不折不扣o既男人.....
同佢傾左陣,最後約好第二日8點出海玩~(賣個關子,我地會出海玩咩呢?)
之後就o係海邊坐下,游下水~好耐冇試過游海水,原來D海水真係好咸.....
呢度o既日落真係好靚~~~~~~~
日落之後,都已經好肚餓,行左一陣就搵到間野食buffet,平靚正~~~
Mango Banana~好好味~
食完野梗係返酒店啦~成晚冇訓,實在太累,好早就訓左lu~
(to be continued...) | | |
| 第一日
一早起身趕去機場,由香港撘飛機去馬尼拉,菲律賓o既首都.
我地班機大約一點半到馬尼拉,即刻就要轉機去Caticlan.
去Boracay有兩種方法,可以由Caticlan或者Kalibo去,Caticlan去就好近,坐船唔洗二十分鐘,Kalibo就遠好多,我唔知Kalibo有冇得直接去Boracay,我諗應該有,好似o係其他blog睇過,不過點都遠D,因為Kalibo同Caticlan都已經相差一個鐘頭車程.
話說,去到馬尼拉,兩個鐘之後就要轉機去Caticlan,我地問一問人,原來唔係同一個terminal,我地o係terminal 2落機,但係要去terminal 3轉機,咁我地以為都係同一個機場,好易搵,點知再問人,D人叫我地撘的士去.....唔係呀嘛.....
我地當時已經唔夠兩個鐘,時間,所以即刻就要搵車撘,見到有個人o係度叫"Taxi,Taxi"咁就同佢講下價,佢出價P250,我地還價P200,即時成交~(之後先知,原來呢度D車費好平,terminal之間行走可以平到P20,即係我地比左十倍價錢....滴汗)
跟住我地一直跟佢去攞車,當時又落雨,又有兩件行李,仲要走咁遠路....o個個人收得我地錢,服務都算係咁,又比遮我地,佢自己就淋雨,仲幫我地拎行李....一個人拎兩大舊行李~勁~(菲律賓D人個個都好樂意幫你搬野,只要你肯比少少錢)
佢架車都泊得幾遠,行左都成十分鐘(我地已經冇乜時間...),跟住佢車左我地去terminal 3,其實真係好近,十至十五分鐘左右就到...
去到teminal 3,即刻去排隊check in,當時係2:10pm左右,我地班機係3:10pm起飛,我估我地仲有時間o既~
排左冇幾耐,成日聽到廣播,但係又唔知佢講乜,因為D聲好矇,淨係聽到有聲,知有人講野,但係完全唔知佢講乜...過左一陣,排我地後面o個個菲律賓人見我地好似好緊張,就走黎答訕,原來個廣播係講緊我地班機.....跟住我地就問下職員,佢比我地打尖走去counter,有個職員就開始幫我地check in~~正當我地好放心以為所有野都搞掂,佢同我地講,班機已經飛左.......冇等我地.....我地梗係嬲啦,不過最緊要係諗辦法去到目的地...所以我地叫佢arrange另一班機比我地撘,點知,check一check之後,話今日已經冇飛機去Caticlan.......再叫佢check埋去Kalibo o既飛機....都冇埋....
o係咁無助o既情況之下,我地可以點?
我地走左去ticketing office,去arrange下一班機,最早o個班都要第二日6:30am......激死.....更加可惡o既係,佢地仲要罰我地錢.......相量之後,我地冇得揀....比人厄完又厄,真係.....(記住呢間係Cebu Pacific...如果怕要訓機場就要預at least四個鐘頭去check in,如果唔係,幫襯第二間啦...)
最後,我地唯有拎住兩大舊行李o係馬尼拉遊盪...............
我地揀左Mall of Asia做落腳點,因為點都叫有冷氣,同埋可以行足一日~
行左好耐,睇左好多野,跟住又去左Mall外面o既海邊行左陣,然後就返入Mall食飯,D野食都算唔錯o既~又有一個超慢o既免費wifi,睇到"海高斯"吹緊去香港~
跟住仲去左睇電影~Mirrors~冇字幕架~第一次o係香港以外o既地方睇電影~
睇完戲都已經十二點,成個Mall已經熄晒燈,要個食蕉哥哥帶我地出去撘的士返機場,呢晚都要o係機場訓架喇......唉.......好彩o係Mall買左D水同食物,我又帶左部eeePC去,可以睇下戲,冇咁悶~
成晚就係咁過,我就冇乜點訓過.......
(to be continued...)
| | |
|
